రామాయణ దృక్పథం

రామాయణం గురించి చర్చ వచ్చినప్పుడు వంశీ అన్నయ్య నాతో పంచుకున్న వ్యాసం ఇది..

అపరిచితుని ప్రశ్న: మీరు రామాయణం గురుంచి చాలా బాగా చెప్పారు…నేను కూడా మీలా సంపూర్ణంగా రామాయణం చదవాలని అనుకుంటున్నాను…నాకు ఒక మంచి పుస్తకం సూచించారా?

కళ్యాణ్‌ జవాబు: తప్పకుండా చెప్తాను. ఏ రామాయణమో మాత్రమే కాదు, ఎలా చదవాలో కూడా చెబుతాను. అలా తప్పక చదవండి. అది వేరేదేదో ‘పుస్తకం’ కాదు. శ్రీమద్రామాయణమే!

ముందు రామాయణం ఒక పుస్తకం కాదు, అలా అని నమ్మండి. రామాయణం పుస్తకం అనుకుంటే దానికీ స్పైడర్ మ్యాన్ కామిక్ కీ తేడా వుండదు. రామాయణము ఇతిహాసమని నమ్మండి. ఇతిహాసము అంటే, "ఇది ఇట్లే జరిగినది" అని. ఒకడు ధర్మాన్ని ఆచరించమని చెప్పటం వేరు. తన బ్రతుకంతా ధర్మాచరణ చేసి మనకి అది సాధ్యమేనని నిరూపించటం వేరు. అలా చూస్తే, రామాయణము మనకి ఆదర్శమవుతుంది. పుస్తకం అనుకున్నంతకాలం అవదు.

అలాగే, ఎన్నో రామాయణాలున్నాయి. అన్నిటి కన్నా ఆదికావ్యము మాత్రము శ్రీ వాల్మీకి రామాయణము. అదే ప్రమాణము. కేవలము వాల్మీకి మహర్షి మాత్రమే బ్రహ్మగారి వరము చేత అసలు కథంతా ఎప్పుడు ఏమి జరిగిందో , ఎవరి మనసులో ఏముందో తో సహా కంటికి కనపడి రాసారు. అందులో కల్పితము లేదని నమ్మండి. మార్స్ గ్రహం పైనుండి రోవర్ల తో ఫొటోలు తెప్పించుకుని చూసే మనము, వాల్మీకి మహర్షికి అలాంటి దివ్యదృష్టి వరం ఒకటి వుండేదంటే అతిశయము కాదు అని నమ్మండి. మనసులో శాస్త్రాశాస్త్రీయాలు తీసివేయండి. కేవలము మానవ మాత్రులు కనిపెట్టిన రాకెట్లు సౌరకుటుంబం ఆవలికి వెళుతోంటే, ఓ మహా బలశాలి అయిన వానరము ఓ సముద్ర లంఘనము చేయటం పెద్ద విషయము కాదని నమ్మండి. ఒక్క సంతకం ఒక దేశాధినేత చేస్తే ఓ దేశం పైన అణుబాంబులు పడి నాశనం అయ్యే అవకాశాలున్న ఈ కాలం లో , ఓ బ్రహ్మాస్త్రము, ఓ రామ బాణము అత్యంత బలవంతమైనవంటే నమ్మండి. లక్షల కిలోలున్న బరువులను ఓ రైలు ఇంజను లాగగలిగినపుడు, వేల కిలోల బరువున్న వ్యోమనౌకలను రాకెట్లు అంతక్షంలోకి మోసుకెళ్ళి వాటిని ఉపగ్రహ కక్ష్యలో ప్రవేశపెట్టగలిగినపుడు, ఓ మహా వానరుడు ఓ కొండను తన యోగవిద్యద్వారా ఎత్తి తెచ్చాడంటే నమ్మండి .ఇప్పుడంతా ఆస్తులకోసం కొట్టుకు చచ్చే అన్నదమ్ములే కాబట్టి మనకి తెలియకపోవచ్చును కానీ, ఓ ఇద్దరు అన్నదమ్ములు ఒక మహారాజ్యం, రథచక్రం ఎంత దూరం తిరగగలిగితే అంతదూరం తమ హక్కుగా వున్నా, ఆ రాచరికం నాకొద్దంటే నాకొద్దని వాదులాడుకున్నారంటే నమ్మండి. ముందు రామాయణాన్ని విశ్వసించండి. ఆపైన, కథను తెలుసుకోండి. తెలుసుకోవటమంటే ఏదో కట్టె కొట్టే, తెచ్చె కాదు.

ఇప్పుడు అందరూ రామాయణంలో తప్పులున్నాయ్ తప్పులున్నాయ్ అని చెవులు కోసేసుకుంటున్నారు కదా, మరి రాసే వాల్మీకికి ఆ విషయం తెలియదా? రామాయణం కల్పితమైతే ప్లాట్ లో లొసుగులు ఎందుకు వదుల్తారు? రాసేది ఆయనేగా! వాటి వెనుక ధర్మసూక్ష్మాలను పరిశీలించండి. అసలు అష్టసిద్ధులు ఏమిటో, హనుమ వాటిని ఎలా ఉపయోగించారో తెలుసుకోండి. ఏం జరిగిందో కాదు, ఎందుకు జరిగిందో పరిశీలిస్తే అనుమానాలు రావు.

నేను చెబుతున్నాను. అవి వాస్తవానికి దూరంగా వుండవచ్చు. గంటానలఫై నిముషాల్లో పధ్నాలుగువేలమందిని రాముడు కడతేర్చవచ్చు. అది మనకు నిజమనిపించకపోవచ్చు. మనకంటికి కనపడేదే వాస్తవం కాదు కదా. సూర్యుడెప్పుడూ అక్కడే వుంటాడు. కానీ మనకే మనమున్న ప్రదేశం వలన రాత్రి పగలు , వేడి , చలి ఎలా అనుభవమవుతున్నాయో, మనం వున్న స్థితికి రామాయణం లోని విషయాలు వాస్తవంగా యదార్థంగా తెలియకపోవచ్చు. అంతమాత్రానా, సూర్యుడు లేడనలేము కదా! మనకు ఆ అవకాశం ఇంకా రాలేదని. అంతే!

ఈ తరం రావణాసురుణ్ణి హీరోలా కొలుస్తున్నారు. సీతమ్మను ముట్టుకోలేదు కాబట్టి గ్రేట్ అంటారు. కానీ అది ఏ ఉత్తరకాండలోనో కారణం దొరుకుతుంది. బ్రహ్మ, నలకూబరుడు వంటి వారి శాపాలను పోగుచేసుకుని వున్నాడుని చదివితేనే కదా తెలిసేదీ!

ఎందుకు యుద్ధకాండలో ఇంద్రజిత్తును పూజ కూడా చేసుకోనివ్వకుండా చంపవలసి వచ్చిందో , అతని ఆ వరప్రభావమేంటో మరోకాండలో కనబడుతుంది. ఓ కాండలో నలుగురు సచివులను వెంటబెట్టుకుని తిరుగుతూ బలహీనంగా కనపడిన సుగ్రీవుడు నిజానికి ఎంత పవర్‌ఫుల్ రాజో మరో కాండలో తెలిసొస్తుంది.

సీతమ్మను నిజానికి రాముడు "అగ్ని పరీక్ష" చేయించలేదని రామాయణం చదివితే కదా తెలిసేదీ! అసలు ఆ సర్గలో అగ్నిపరీక్ష అనే మాటలేదు.

హనుమంతుడు ఎంతటి బలవంతుడో జాంబవంతుడు గుర్తుచేస్తే మనకు హనుమకు తెలుస్తుంది. కానీ హనుమ ఎంతటి బలవంతుడో హనుమ చెప్తే ఎలా వుంటుంది? "సీతమ్మను లంకలో వెతుకుతాను. దొరకకపోతే స్వర్గానికి పోయి వెతుకుతాను. దొరకకపోతే రావణుడు పదితలలపురుగు. పిడికిట్లో పట్టి తెచ్చి రాముడిపాదాలవద్ద పెడతాను. అయితే సీతమ్మను తెస్తాను. లేదా రావణలంకను మొత్తం పట్టి తెస్తాను" అంటారు. హనుమ తన శూరత్వమును ప్రదర్శిస్తే మామూలుగా వుండదు.

అలాగే సీతమ్మను అడవులలో వదిలివేయటం వంటి ఏ విషయమూ మనము చదవకుండా ఒకనిర్ణయానికి రాకూడదు. చదవాలి.

ఆకాలంలో వర్షఋతువు ఎలా వుండేదో తెలుసుకోండి. ఆ కాలం లో ఎన్ని వానరాలు యుద్ధం లో పాల్గొన్నాయో కనుక్కోండి. అసలెందుకురాముడంటే అందరికీ అంత పిచ్చో కనుక్కోండి. హనుమ, విభీషణాదులతో సహా, కోట్ల వానరాలూ, జంబూకాలూ, అయోధ్యావాసులు, మీరు, నేను, ఎందుకు మన హృదయాలను చింపి రాముడికి తివాసీ కుట్టి పరచాలో ఆలోచించండి.

రామాయణాన్ని చదవకండి, మీరూ ఓ పాత్ర అనుకోండి. మీముందు రాముడు సీతకోసం చెట్లను పుట్టల్నీ మిమ్మల్నీ పట్టుకుని విలపిస్తున్నాడనుకోండి. మీరూ హనుమ తోక పట్టుకుని లంకకు వెళ్ళి సీతమ్మతల్లిని వెతకటంలో సహాయం చేయండి. రాముడి వేదనా, వాల్మీకి అంతర్మథనమూ మీరూ పడండి. అప్పుడు రామాయణం మీకు హృదయంలోకి ఎక్కకపోతే నన్నడగండి.

సీతమ్మ మీ మనస్సనుకోండి, రావణుడనే దుర్మార్గంలో మీ మనస్సుందనుకోండి, రాముడనే సన్మార్గానికి మీ మనస్సును తిరిగి తేవటానికి హనుమ అనే దివ్య యోగతత్వము సహాయము తీసుకుని, ఓ యుద్దం చేసారనుకోండి, మీ మనస్సనే సీత రాముడనే దారికి చేరితీరుతుందని తెలుసుకోండి. ఇలా రామాయణానికి నాలుగు మూలస్తంభాలుగాల సీతారామహనుమరావణులు ఆడిన "సీతాయాశ్చరితంమహత్" లో మహత్తేంటో విచారించండి.

రామాయణము మీకు ఎలా ఉపయోగపడగలదో అది ముఖ్యము కానీ, అందులో తప్పొప్పులు నిర్ణయించి వాల్మీకి మహర్షికి మనమిచ్చే పాస్ ఫెయిల్ సర్టిఫికేట్ ముఖ్యం కాదు.

మీకు రామాయణం లో అసలేముందో తెలుసుకోవాలంటే రామాయణం చదవండి, కేవలం అర్థతాత్పర్యాలు చదివితే కథ తెలియదు. కొత్తలో కొంచం విసుగు రావచ్చు. మూడు రోజుల తరువాత మళ్ళీ చదవరు. రామాయణంలో మీ స్వార్థాన్ని వెతకండి. "ఇదిప్పుడు నేను ఎందుకు చదవాలి?" "నాకు అహల్య క్యారక్టర్ గురించి రామాయణంలో ఏముందో కావాలి". "రామాయణాన్ని కావ్యమని అందరూ అంటారే, ఈ కళ్యాణేమో ఇతిహాసము, హిస్టరీ అంటున్నాడే! అసలు రామాయణంలో కవిత్వం ఏముందో తెలుసుకోవాలివాళ!" అనుకుని చదవండి.

రామాయణం అసలెలా మొదలైంది, ఎటుపోతోంది, ఎలా అధ్యాయాలు కుదిరాయి, ఏమేం విశేషణాలు ఎవరెవరికు పడ్డాయి, వంటివి మనకు తెలియాలి, చదువుతూ, ఓరకంట ఇవన్నీ గమనించాలి.

ముందొక గోరఖ్‌పూర్ రామాయణము సెట్టు కొని పెట్టుకోండి. ఇంక రోజుకు ఎక్కువ వద్దు, ఒక్క అధ్యాయమే చాలు. చదవండి. పుస్తకం మూసి కథను visualize చేసుకోండి.

వాల్మీకి శైలిపైన కూడా ఓ కన్నేయండి. ఒకచోట అమిత పరాక్రమశాలి అయినటువంటి రావణుడు, అనంటే, ఒకచోట కార్యదక్షత తలిగిన రావణుడు అంటారు వాల్మీకి. మరి రావణుడు విలన్ కదా, ఎందుకు పొగిడారు?

ఒకచోట సీతమ్మను "ఫదినెలలు రావణుడి కొలువులో వున్న సీత" అంటారు, మరి ఆవిడ బలవంతంగా కదా వుందీ?

రామాయణంలో ప్రతీ మాటా ఒక విశేషణంతో వుంటుంది. అంటే, "ఓ రామా!" ఎవరూ అనరు. "మాటమీద నిలబడే ఓ రామా!" అంటారు అక్కడ రాముడు మాటమీద నిలబడవలసిన అవసరం వచ్చిందని ఆ అన్నవాడి భావన. . "హే హనుమా!" ఎవరూ అనరు. "హే మహాబలశాలీ హనుమా!" అంటారు. అప్పుడాయన బలంతో ఏదో పనుందన్నమాట. ఏ కొండలో ఎత్తాలి, ఏ సముద్రమో లంఘించాలి.

రామాయణం పూర్తిగా జీర్ణమైతే మీరింక ఎవర్ని పలకరించినా ఓ మంచి మాట వచ్చేస్తుంది.

శ్రీ చాగంటి కోటేశ్వరరావు గారి నలభై ఒక్క రోజుల పూర్తి రామాయణం ప్రవచనాన్ని కొన్ని సార్లు, పోతే చాలా సార్లు వినండి. యూట్యూబ్ లో ఉచితంగా వుంది. (లింక్స్ ఇస్తాను) రోజుకు మీరు ఆఫీసునుండి వెళ్ళేప్పుడో, వచ్చేప్పుడో, ఓ ఇరవై నిముషాలు వింటూ వెళ్ళండి. చాలు.

ఇంక ప్రఖ్యాతి గాంచినది రామచరితమానస్. అదొకకాపీ వుంచుకోండి. వాల్మీకి ఏమన్నారు, తులసీదాసు గారు ఏమన్నారూ తేడా పసిగట్టండి. ఓ వ్రతంలా కాకుండా రామాయణం మీ జీవితంలో ఓ భాగం అయిపోవాలి.

నేను చెబుతున్నాను. పూర్తి స్వార్థం తో రామాయణం చదవండి. "రామాయణం చదివితే నాకేంటి?" "నాకేంటి లాభం?" అని చదవండి. 24000శ్లోకాలలో ఏదో ఒక విషయం మనకు కావలసినది దొరకదా? మళ్ళీ మళ్ళీ చెబుతున్నాను. రామాయణంలో మీకు నిజంగా దొరకని సమాధానం అంటూ వుండదు. సత్యంగా మీకు రామాయణం ఏమీ నేర్పలేని రోజున మీరు ఆ పుస్తకాన్ని పక్కన పెట్టేయవచ్చు. కానీ నేను ఛాలెంజ్ చేస్తున్నాను. రామాయణం మీకా అవకాశం ఇవ్వదు. 👍

కేవలం రాముడి మాటలు, నడవడికా గమనిస్తూపోతే రామాయణం ఓ ధర్మశాస్త్రం.

కేవలము ఋుతు వర్ణన గమనిస్తూ పోతే రామాయణం ఓ వాతావరణ శాస్త్రం.

కేవలం రామాయణంలో ఎక్కడెక్కడ ఏయే శకునాలు చెప్పారో గమనిస్తూ పోతే రామాయణం ఓ శకున శాస్త్రం.

కేవలము ఒక శిష్యుడికోసం గురువు ఎంతగా తపిస్తాడో , చూస్తే రామాయణం ఏకమొత్తంగా ఒక పాఠశాలే అవుతుంది. కోరా ఏం పనికి వచ్చేను నా తలకాయీ… అబ్బో ఏమి అగస్త్య మహర్షి, ఏమి రాముడు, ఏమి వసిష్ఠులవారు ఏమి ఆ ప్రశ్నలు- ఏమి ఆ సమాధానలు… గుండె నిండిపోలా…

1+1 ఇజీక్కొల్టూ ఎంత? అని డబ్బులకోసం కోరాలో ఉత్తినే ప్రశ్నలు అడిగే దౌర్భాగ్యులు అసలు ప్రశ్నంటే ఏమిటి, ఎలా అడగాలి, గురువుగారు జవాబు చెబుతోంటే చెవులు దొప్పలు చేసుకుని ఎలా వినాలి,పరిప్రశ్న అంటే ఏమిటి, అసలు శరణాగతి అంటే ఏమిటి, చేస్తే ఏం జరుగుతుంది, అని తెలిస్తే సిగ్గుతో చచ్చిపోతారు.

కేవలము రామాయణం లో పాత్రల వ్యక్తిత్వాలు, వారి నడవడికా , మన్ననలు గమనిస్తూ పోతే రామాయణం ఓ వ్యక్తిత్వ వికాస మహా గ్రంథం.

కేవలము హనుమను గమనిస్తే రామాయణము "The Adventures of Bajarangi"

కేవలము రామాయణం లో , తదితర పురాణాల్లో దేవతల రూపురేఖల వర్ణనలకోసం పరిశోధించి ఓ 150 ఏళ్ళ క్రితం రవివర్మ అనే కళాకారుడు మనకు దేవతలరూపాలను గీసిచ్చాడు. ఇప్పటికీ అవే మనకు దేవతారాధనకు మూలాలు. అదొక రకమైన తపస్సనే చెప్పాలి. ఆ తపస్సే ఫలించిందాయనకు🙏🏻

కేవలము సీతా, మండోదరి, అహల్య, మాతా అనసూయ, ఇలాంటి పతివ్రతల కథలే వెతుక్కుంటూ పోతే రామాయణం దానికదే ఓ పుణ్య గాథల సమాహారం.

ఇలా వంద పార్శ్వాలుంటాయి.

కేవలము భక్తి ప్రధానంగా చూస్తే , రాముడు- పూర్వీకులు, రాముడు-సూర్యుడు, రాముడు-హనుమ, రావణుడు-శివుడు, రాముడు- విభీషణుడు, రాముడు- భరతుడు, రాముడు- లక్ష్మణుడు, ఇలా వంద బంధాలను మనం అవగాహన చేసుకోగలము.

ఇలా ఏ విధంగా ఎన్ని కళ్ళజోళ్ళు పెట్టుకుని చదివితే రామాయణం బహుధా మనకన్నన్ని రకాలుగా కనపడగలదు.

మీకు రామాయణము పూర్తిగా జీర్ణమవాలని ఆశిస్తున్నాను.

ఒకటవ సవరణ: నాకు ఇప్పటికీ వస్తోన్న అసంఖ్యాక పర్సనల్ మెసేజీలు, ఈ పుటకు కామెంట్లు, నోటిఫికేషన్లను చూస్తే, మీయందు రామాయణాన్ని చదవాలని ఆకాంక్షను, అనురక్తిని ప్రేరేపించగలిగినందుకు నాకు మహదానందంగా వుంది. ఆ శ్రేయస్సంతా గురువులు చాగంటి గారు వంటి వారి చలవనే తప్ప, నా మొహం నాకంత చేవవుందని నేనెన్నడూ అనుకోను. ఇప్పుడుinterest కుదిరాక, ఏ రామాయణం చదవాలో చెప్పకుండా సమాధానం పూర్తి చేయటం నా వైపు తప్పగా తోస్తోంది. అక్కడికీ చాలా authentic రామాయణాల పేర్లు జవాబులో చేర్చినా, ఇంకా అడుగుతున్నారు కాబట్టి ఈ సవరణ🙏. కానీ, యదాతథ వాల్మీకి రామాయణం తప్ప వేరెవరు వచన, మలిరచనలు చేస్తే అది ప్రామాణికమని మీకు సూచించటానికి నా మనస్సు అంగీకరించదు. నేను సూచించీన దాంట్లో పొరపాట్లేమైనా లేకుండా వుండటానికి, అందునా రామయణం విషయంలో వుండటానికి నేను చాలా ఆలోచిస్తున్నాను. నాకు వీలైనంత త్వరలోవాకబు చేసి, కొన్ని రచనలు, కుదిరుతే వాటి లింకులు ఈ జవాబులో సరిచేర్చగలను. మీ అందరి ఆదరణకు, నాబోటి గాడిపై కూడా ఓ ప్రశంసా వాక్యం వదిలిన మీ అందరి పెద్ద మనసుకు బహుధా వందనాలు 🙏

-కళ్యాణ్